Zapustowa sezona jo se zakóńcyła pó źewjeś tyźenjach a jo trała wót 18. januara do 22. měrca. W cełku su zapustaŕki a zapustarje z wjedrom gluku měli. Žeden zapust jo do wódy padnuł, jano 16. februar jo był pitśku zymny. Toś ten źeń jo był jadnučki zapustowy termin ze zymnymi temperaturami a ze sněgom. Teke lětosa jo se zasej swěśiło do spótnego casa.

Jaden problem, kótaryž buźo nas w pśiducych lětach dalej pśewóźowaś, jo brach kapałow. Wjele muzikarjow jo starše wordowało abo wěcej njegrajo. Skóro kužda wjas ma swóje kšute terminy za swěśenje zapusta. Dla togo pak, až muse wóni na liche terminy kapałow źiwaś, pśesunu swóje terminy. Pśez to maju cesto susedne jsy na samskem dnju zapust. Nanejmjenjej jo jich było 52 zapustow w běgu źewjeś tyźenjow. Wušej 4.204 luźi jo swěśiło zapust w Dolnej Łužycy a jo woplěwało nałog wugónjenja zymy. Wótere źowća a žeńske su se lapu stajili, a to nic jano w Bórkowach a we Wjerbnje. Nagromadu jo 75 lapow w zapustowem casu wiźeś było.