Z Budyšyna/Bautzen. Na głownu zgromaźinu Maćice Serbskeje jo slědnu sobotu 40 cłonkow a gósći pśichwatało do zala Serbskego muzeja w Budyšynje. Na dnjownem pórěźe pósejźenja wědomnostnego towaristwa su stojali mjazy drugim změny wustawkow a směrnicow Salowskego fondsa. Wobej pšosbje wó spěchowanje z fondsa su se južo do togo pśizwólili. W lětosnem wědomnostnem pśednosku jo se wěnował dr. Kito Kśižank wejsnym mjenjam a Dolnej Łužycy.

Prof. Dietrich Šołta jo pśibytnych witał, tomu jo se pśizamknuło spominanje na zemrětych cłonkow. Śěžyšćo głowneje zgromaźiny twóri rozpšawa pśedsedaŕstwa, kótaruž jo pśedsedaŕka dr. Anja Pohončowa pśednjasła. Wóna jo se źěkowała wšyknym sponsoram towaristwa a dariśelam pósćiwańskego abonementa Rozhlada. Licba cłonkow jo z aktualnje 105 stabilna. Wjele proce jo se nałožyło za pśigótowanje pšawniskich změnow wustawkow, aby se towaristwoju status powšykneje wužytnosći (Gemeinnützigkeit) zdźaržał. W źěłowej kupce stej mimo pśedsedaŕki teke Cordula Rataj-czakowa a Robert Lorenz statkowałej.