W našom rěźe wó starjejšych, kótarež powědaju wěcej ako jadnu rěc ze źiśimi, pśedstajijomy źinsa Antju Kellowu. Wóna jo ceptarka na Dolnoserbskem gymnaziumje. Z njeju jo powědała Stefanie Krawcojc.

Nowy Casnik: Kněni Kellowa, wjele źiśi maśo?

Antje Kellowa: Mam syna a źowku. Milan jo 18 lět, Lejna 17 lět stara.

Wót źo Wy póchadaśo?

Ja som z města. Mója mama póchada z Vogtlanda, mój nan jo z Lauchhammera. Mój stary nan a stara mama stej ze Českeje a ako sudetske Nimce stej musałej tam wuběgnuś. Mój stary nan jo był dwójorěcny, jo nimski a česki powědał.

Ze swójima góleśima sćo serbske powědali, nic ga?