Chóśebuz/Cottbus. Kriminalita w Chóśebuzu jo w slědnych lětach někak ta samska wóstała, glědajucy na licby njestatkow a złoźejstwow. To jo Bettina Groß, wjednica policajskeje inspekcije Chóśebuz/Sprjewja-Nysa, k wěsći dała na pósejźenju měsćańskeje zgromaźiny 31. maja. Bóžko pak pśecej wěcej awtow kšadnu. W lěśe 2016 jo se to stało 206 raz, a wušej togo su se złoźeje 301 raz zadobyli z namócu do awtow, aby wukšadnuli drogotny techniski rěd a druge wěcy z awtow. Wósebnje „woblubowane“ pśi tom su awta typa „Audi“. Teke pśecej wěcej kólasow w měsće kšadnu, to wucynijo pśisamem 30 % wšych kšadnjenjow.

Jadnu nowosć jo chóśebuska policajska „šefowka“ teke pśipowěźeła. Policaja, ako kontrolujo awta a motorske na drogach, jo dostała nowu modernu techniku. Z njeju mógu te, ako deje štrofu płaśiś, to ned cyniś ze swójeju bankoweju kórtu.