Wón njejo napisał žedne knigły, žedne basni, žedne kjarliže daniž wjelike literarne źěła. Jogo mě buźoš we leksikonach něgajšnych a źinsajšnych serbskich wójowarjow a patriotow pódermo pytaś. A weto buźo wjele powědarjow serbskeje rěcy ze źěkowneju wutšobu a we lubosći na njogo spominaś. To grono jo how wót bura Fryca Krügera ze Strjažowa, kótaremuž su na serbske gronili Hatkojc Fryco abo Hatko. Wón jo zamrěł na 3. maju, we 88. lětu swójogo žywjenja.