Rań/Großräschen. Sakski ministarski prezident Stanisław Tilich (CDU) a jogo bramborski kolega Dietmar Woidke (SPD) stej pósłałej nimskej kanclarce Angeli Merkelowej pismo, w kótaremž pominaju wót nimskego zwěstka, až dej pomogaś z pjenjezymi pśi pśeměnjenju góspodarskich strukturow w Łužycy. Za jeju zdaśim dej ta suma nanejmjenjej 1,2 miliarda euro wunjasć za cas 2019-2024. To pominanje stej wobzamknułej sakske a bramborske kněžarstwo na zgromadnem wobradowanju we Ranju (Großräschen) pśed dwěma tyźenjoma. Pśeto energetiska politika a wótstupjenje wót brunice stej se w Barlinju wobzamknułej, a Nimska dej stronam, kótarež muse nejwětše brěmje togo wobzamknjenja njasć, pomogaś.