Pśedslědny kóńc tyźenja jo był wjeliki wejsny swěźeń w Zabroźe (blisko Carneje Plumpy). Pśicyna jo była 50. jubilej Šalmajoweje kapały. Wóna kapała ma ako wopon głowu wjelka – kaž tež wognjowa wobora, ku kótarejž kapała słuša.
Pśi sportnišću su toś stajili wjeliki stan, skokanišćo za źiśi a wšake budki za śělne derjeměśe. „Traktorowe pśijaśele“ su wustajili swóje jězdźidła.
Sobotu su zachopili a tśi a połtera štundy su pokazowali pyšny program, mjazy drugimi su rejowańske kupki pokazali něco a źiśi su wustupowali w uniformach wognjoweje wobory. We stanje su natwarili scenu ako w kowalni z wognjom. To su wužywali za „polku z nakowku“ („Amboss-Polka.“). Pinkojc Helmut a Andreas a Mathiszikojc Christian su wuklapali melodiju z klapacom. Wjacor su byli reje.
Njeźelu jo była namša w cerkwicce jsy. Zabroźańska šalmajowa kapała jo pśewóźowała namšu muzikaliski. Tam njejsu ale te „šalmajarje“ se uniformy wognjoweje wobory woblakli ako howacej.