Janšojce/Jänschwalde. Powěsćowy musical „Kara w kraju lutkow“, ak su wukniki Krabatoweje šule 9. juniju pśi góźbje šulskego swěźenja pśed-stajili, by se Krabatoju zawěsće spó-dobał. Pód wjednistwom źiwadłowego a rejowarskego pedagoga Michaela Apela z Chóśebuza su wukniki cełe lěto proby měli, baslili a kostimy šyli. We projektowych tyźenjach su se zaběrali z temu „powěsćowe póstawy Łužyce“, su woglědali do janšojskego muzeja a do gaja słowjańskich bogow w Gatojcach. A tak jo nastał pšawy musical, źož kuždy grajaŕ jo swóju rolu měł a z lubosću grał.
Tu głownu paršonu, Karu, stej grałej raz Melina Krawcojc, raz Lysann Šemelojc. Wónej stej jadna drugej tak pódobnej, až naslědku su pśiglědarje byli wše zwite, ako jo jim wordowało zjawjone, až Karu stej grałej dwě źowći.
Wó co jo we tom tšojenju šło? Karje jo se w nocy cowało, až wóna a kócor Hanzo (Tim Schmidt) drogujotej pśez kraj lutkow. Tam zmakajotej wšake basnickowe figury – pśezpołdnicu, błudnika, nyksa, plona, wužowego krala a lutki. Do rozgrona su byli zapleśone serbske słowa a sady, na pśikład gaž mama jo źiśam „dobru noc“ žycyła.