Žylow/Sielow. W serbskej źiśowni Mato Rizo źěła južo někotare tyźenje nowa praktikantka. To jo 20lětna Tabea Rauthojc z Dubjego (Eichow). Wóna wuknjo we prědnem lěśe we Zentrumje za wušy schójźeńk (Oberstufenzentrum) w měsće na wótkubłarske (Ausbildung als Erzieher(in)). Tam ma teke serbsku wucbu, tśi wucbne štundy na tyźeń. Jeje wótkubłanje buźo traś tśi lěta, pótom buźo wuwucona wótkubłarka.

Praktikum w Žylowje jo jeje prědny – wóna dej we prědnem lěśe wósym tyźeni we praksy źěłaś. Pjerwjej jo gótowała dobrowólne socialne lěto we wjažy za duchnje zbrašone źiśi w měsće, źož hyšći źinsa, pódla šule a praktikuma, pór štundow na tyźeń źěła a na ten part sebje něco kapsnych pjenjez pśizasłužujo.

Tabea ma serbske kórjenje. Jeje staru mamu młogi naš lazowaŕ derje znajo: To jo wucabnica za fyziku a matematiku na wuměńku Jadwiga Krokorowa, ak jo pjerwjej ceptariła na Dolnoserbskem gymnaziumje. Tam jo teke Tabea wuknuła. Tu šulu jo wótzamknuła z fachoweju abituru.