Z Lěšćow pla Grodka/Hornow. Koncern Mitnetz Strom z Kabelsketala pla Halle librujo elektricu mjazy drugim do jsow na pódzajtšnem boce Grodka. Teke wjas Lešće/Hornow słuša k jich wóteběrarjam. Tudy su pśed pór tyźenjami pśepowdali staru a njetrjebanu trafo-staciju grodkojskemu NABU. How budu wótněnta bydliś njedopyrje.
Koncern jo we slědnych mjasecach elektriske nadzemske pśewódy (Leitungen) a sćažory wóttwarił a je z kablami we zejmi narownał. Z tym tśi pjerwjejšne trafo-stacije se wěcej njepótrjebaju: w Błobošojcach (Bloischdorf), Prašyjcy (Schönheide) a něnto teke w Lěšćach. Wóni wšykne su se pśepowdali zwěstkoju za woplěwanje natury NABU, wótźělenje w Grodku.
To se maka z filozofiju librowarja elektrice. „My se južo dłujko angažěrujomy za woplěwanje ptaškow“, jo groniła casnikarska powědarka koncerna Evelyn Zarubowa pśi pśepowdaśu lěsćańskego trafo-chromcyka. Koncern twari gnězda a kašćiki za rubjažne ptaški kaž sokoły (Falken) abo rěcne jerjeły (Fischadler) a pomoga pśi „wobryckowanju“ młodych bóśonow. To zgromadne źěło spěchujo wjelgin derje.