Na mały jubilej móžo Domowinska župa Dolna Łužyca slědk glědaś. Rowno pśed 20 lětami ga su prědny raz wugótowali turněr w balokopanju z wejsnymi mustwami młodych Domowinskich cłonkow a dalšnych młodostnych. A prědny raz su pón mógali tych dobyśarjow mytowaś z rědnymi Domowinskimi pokalami a cesnymi wopismami (Urkunden). Tegdy w lěśe 1997 pśi góźbje Serbskego swěźenja w Hochozy jo se wobźěliło 17 mustwow, a dobyłej stej pla gólcow Rogozno a pla źowćow Prjawoz.

Prědnu sobotu w juliju jo něnt župa kazała na 20. taki turněr z mjenim „Domowinski cup“, a to do Hchoze. Dla togo, dokulaž běchu sebje Hochoske gólcy slědne lěto w Rogoznje wudobyli prědne městno. Sedym mustwow jo pśišło do Hochoze – pěś muskecych, z Depska, Dešna, Rubyna, Rogozna a Hochoze a dwě žeńskecej, te „micki“ z Hochoze a te „büchse“ z Rogozna.