Gaž pśemyslujośo, źo mógali se wuderiś we ferijach abo na kóńcu tyźenja, ga daś jo Wam pśirucone to: Cartowy kamjeń na granicy Cowjego (Zaue) a Žrobolc (Trebatsch) blisko Gojackego jazora (Schwielochsee)!
Ta wósebnosć togo kamjenja jo dwójaka. To jo k prědnemu nejwětšy zanjasony kamjeń (Findling) we cełej wokolnosći. K drugemu pak jo ten kamjeń za wšym zdaśim južo pomjenjony we „Nienburskem fragmenśe“ z lěta 1180, zapisku jsow we Łužycy, kótarež su słušali kloštarjeju w Nienburgu.
Za znankstwom togo dokumenta namakajo se we bliskosći grodowych teritoriumow Triebus, Liubocholi a Morscina a „sedymich jazorow“ wjelicki kamjeń, kótaremuž gronje Opprin. Mjenjowědniki kaž Walter Wenzel a Karlheinz Hengst su wuznali, až pód tymi wejsnymi mjenjami chowaju se źinsajšne jsy Trebatsch (Žrobolce), Leibchel (Lubochol) a Pretschen (Mrocna) (tu rěcywědnu argumentaciju comy na tom měśce wobejś). Te tśi jsy su pó rědu jano 3 km, 6 km a 12 km wót wónego Cartowego kamjenja pla Cowjego zdalone, a stakim se góda, až to jo wóny Opprin!