Góspodaŕ lěgwa Dietmar Thron jo měł sam źěłane graśe. Pśi bomach su pśicynili kórtki ze słowami. A wóni su byli serbske, dokulaž Kathrin Šwjelina jo je pśed lětami pśestajiła. Góspodaŕ jo Casnikoju wulicował, až te serbske graśe su źiśam dosć śěžke byli. Ale tej młodostnej stej wzełej słownick sobu a na taki part su wšykne wjele pśiwuknuli. Kněz Throm ma teke lažćejśe graśa, jo gronił, ale te njejsu doněnta pśestajone. Foto: V. Zakar 
Jarješk/Jerischke. Rědny cas jo měło 13 źiśi a młodostnych slědny tyźeń we Witaj-camje. Dokulaž stej kśěłej jano dwa młodostnej do rěcnego lěgwa pśiś, jo Rěcny centrum Witaj (RCW) jima póbitował, až mógu zgromadnje ze źiśimi byś w Witaj-campje a měś młodostnym pśiměrjony program. A to jo se wupokazowało lětosa ako wuspěch. Dödingojc bratša Thomas a Stefan stej se ga pokazałej źiśam ako dobrej co-wótkubłarja. 17lětny Thomas, kótaryž gótujo 2018 abituru, pśiźo pśiducy raz snaź ako wótkubłaŕ sobu.
Ako južo wjele lět, jo był Witaj-camp zasej w Jarješku, źož su pśebywali rědny cas w naturje a z wulětami. Nejdlejšy a nejrědnjejšy wulět jo był do Einsiedela. Na tamnej kulturnej kupje su ceły źeń mógali łazyś, smyckowaś, ganjaś a se pógibowaś. Wjacor togo dnja su byli take rozluštowane, až wótkubłarje su jim zakazali dalšny program.