Pśiroda nam dawa wšake wót njebja, na pśikład lětosa w lěśu wjele dešća. Ale njebjo ma teke za se wšake bitowaś. Wósebnosć jo była 7. awgusta zajśmiśe mjaseca. Wóno jo se stało južo pśi schadanju mjaseca wokoło zeger 21:30, krotko pó schowanju słyńca.

W Cazowje bydli fotograf pśirody Rudolf Fischer, kótaryž jo južo wótergi w Casniku a hynźi rědne fota wózjawił. Wón ma k tomu wjelgin dobru techniku, na pśikład objektiw z palneju zdalonosću wót 2000 milimejtarjow. To jo južo domena teleskopow. Cełe foto jo wupołnjone z mjasecom a jo dla togo teke tak połny detailow.

Rudolf Fischer jo Casnikoju wulicował, až jo był njepjerwjej wobtužony, dokulaž njejo nic wiźeł. Jo južo zeger 20:00 wence był we swójej zagrodce w Cazowje. Ale až do zeger 21:00 njejo nic było. Ale pótom jo mjasec chopił za bomami wułykowaś (hervorgucken). Dokulaž žedna góra pla Cazowa njejo, jo fotograf pśisamem kilomejtaŕ dalej pódzajtšo šeł, źož na lichem pólu žedne bomy njestoje.