W znatej restawraciji „Palmiarnia“ su se dali pólski wobjed zesłoźeś. To jo wjelgin derje šmekowało – su wšykne gronili.

Na zajmnu wuzgónjowańsku a amizantnu dožywjeńsku turu jo pśepšosyła Šula za dolnoserbsku rěc a kulturu Chóśebuz do susedneje Pólskeje. Pśi njewšednje rědnem słyńcu su se woglědali zajmnostki Zieloneje Gory a Klepska (Klemzig). Busowy jězd jo był slědkoju napšawdny swěźeń žywjeńskeje radosći a dalejkubłanja, wjasela a młogich pśechwatankow.

Zielona Gora/Grünberg. Chtož drogujo, móžo wjele wulicowaś, groni južo stare pśisłowo. A to su kśěli te drogujuce z Chóśebuza, Hochoze, Drjenowa, Smogorjowa, Bobolc a Lubnjowa w susednej Pólskej teke pśespytowaś. Južo prědny etapowy cil, město Zielona Gora, jo był za drogujucych kulturnohistoriski, twarski a kulinariski wjerašk.