Město Brisbane, głowne město australiskego zwězkowego stata Queensland, wobstoj źinsa ze stotysac bydleńskich domow, twarjenjow a móstow kaž teke wusokich mrokowdrapakow, wusokich drogow, zeleznicowych cerow, pśistawowych wobcerkow a tunelow. Z togo casa, ako jo Serb a slěźaŕ Ludwig Leichhardt z Dolneje Łužyce w Brisbane póbył, eksistěruju rowno hyšći tśi twarske objekty. Nowy Casnik jo za nimi w slědnych tyźenjach glědał.

Ako jo Ludwig Leichhardt (1813 do 1850) w lěśe 1843 prědny raz do pózdźejšego głownego města togo w lěśe 1859 załožonego australiskego zwězkowego stata Queens-land woglědał, jo se južo wuwiła mała „metropola“ pśi rěce Brisbane. Tegdy njejo dało w měsće mósty. Cołny a pśewóze su transport wót jadnogo brjoga na drugi wobstarali. Ako su w lěśe 1839 zmóžnili wobsedlenje teritorija wokoło Brisbane z lichymi farmarjami a sedlarjami, jo w měsće Brisbane bydliło a źěłało južo něźi 5000 luźi. Wót tych tegdy eksistěrujucych domow a twarjenjow dajo jano hyšći tśi twarjenja, kenž su južo za cas woglěda Leichhardta w měsće byli.