Žylow/Sielow. Tudejšna zakładna šula ma wót zachopjeńka togo šulskego lěta nowe mě: Zakładna šula Lutki / Lutki-Grundschule Sielow. To oficielne pósćenje nowego mjenja jo se stało pětk pśed dwěma tyźenjoma: Šula jo jo dostojnje swěśiła z rědnym programom w turnarni.

Wjednica šule Irena Götzowa jo tam źaržała swěźeńske grono. Wóna jo wobspomnjeła, až na šulskej konferency pśed dwěma lětoma su wobzamknuli, až šula dej dostaś nowe mě (pśeto pśisamem wšykne šule w měsće su tencas južo take wósebne mě měli). Kake mě to buźo, to su dejali wukniki, starjejše a ceptarje naraźiś. Wóni su wordowali napominane, sebje něco wumysliś, což derje wutrjefijo tu mysl, „chto my smy“. Mjazy tymi wjelimi wšakimi idejami jo jadna se wěcej raz zjawiła: Lutki. (druge ideje su byli mjazy drugim Zakładna šula Jurija Kocha abo Zakładna šula Witaj). To su znate figury ze serbskich legendow, a źiśi mógu se z nimi derje identificěrowaś. W šuli ma źěł źiśi Witaj-wucbu: Wóni wuknu lazowanje, pisanje, a maju teke sport, wěcnu wědu (Sachkunde) a matematiku w serbskej rěcy – jo Götzowa groniła.