Chóśebuz/Cottbus. Lěcrownož wjedro pśedslědnu sobotu njejo był optimalne a jo se stawnje pśeměnjało, ga weto wjele luźi, starych a młodych, jo pśišło jubilejny swěźeń swójeje něntejšneje abo něgajšneje šule dožywit: 65. lěto wobstaśa Dolnoserbskego gymnaziuma. Teke to, až we wokolnosći jo na tom dnju wjele drugich swěźenjow było, njejo jich pśiźenju zadorało.

Jubilejne zmakanje jo stojało pód motom „[DSG=] Dłujka Serbska Gromadnosć“. Wucabniki su jo organizěrowali z pomocu 10. klase, a wóno jo pśiwabiło młoge znate woblica kaž awtora Jurija Kocha, župana Williama Janhoefer, šefa Rěcnego centruma WITAJ dr. Viktora Zakara a cełu licbu něgajšnych wuknikow z města a wokolnych jsow, kótarež źěłaju źinsa we wšakich pówołanjach abo su južo na wuměńku. Wóni su mógali se rozgranjaś pśi kafeju a tykańcu. Piśa a słodkosći jo sajźiło pśi wšakich budkach a we płatnicach (Zelte). To pśedawanje su wobstarali wukniki 10. klase – dobytk buźo jim wužytny pśi organizěrowanju abi-bala.