Chóśebuz/Cottbus. Wušy šołta Holger Kelch (CDU) jo srjodu tyźeń se zmakał ze zastupnikami serbskich institucijow na źěłowe rozgrono w Serbskem domje. K temam rozgrona jo słušała planowana reforma zastojnstwowych strukturow w Bramborskej, pśi kótarejž město Chóśebuz dej do wokrejsa Sprjewja-Nysa pśibite wordowaś a swój status ako bźezwokrejsne město zgubiś.
Župan Wylem Janhoefer jo chwalił město, měnjecy, až wóno stupa doprědka we pódpěranju serbskich nastupnosćow a jo nosaŕ wažnych serbskich insitucijow. To by snaź był argument pśeśiwo reformje – jo měnił. Wjednik dolnołužyskego běrowa Domowiny Marcus Końcaŕ jo pak dodał, až jo śěžko jano ze serbskimi nastupnosćami kradu pśeśiwo reformje argumentěrowaś, pśeto wóni słušaju k měkim faktoram, ako worduju lažko wótbite [wót redakcije: oficielne měnjenje Domowinskeje župy jo, až serbske nastupnosći njedeje pśez reformu do škódy pśiś].