Wórjejce/Hoyerswerda. Załožba za serbski lud njebuźo daś žednych pjenjez towaristwoju „Smy“ za pśigótowanje wuzwólowanja prědnego demokratiski wuzwólonego zastupnistwa serbskego luda. To jo wobzamknuła Rada Załožby za serbski lud na wobradowanju pětk w Wórjejcach. Z tym su wótbili póžedanje iniciatiwy, kótaraž jo ksěła dostaś 300.000 abo 100.000 euro za pśigótowanje wuzwólowanja prědnego „pśedparlamenta“ (ta suma jo wótwisna wót togo, lěc pśi wuzwólowanju z listom buźo móžno z pomocu amtow identitu wuzwólowarja wobwěsćiś). „Cel teje pšosby njemaka se ze zmysłom załožby, ak jo wopisany we statnem wujadnanju“ – jo rada swójo wobzamknjenje krotko wupšawiła. [We statnem wujadnanju stoj, až „cel załožby jo woplěwanje a spěchowanje serbskeje rěcy a kultury ako znamje identity serbskego luda“]. To wobzamknjenje jo se stało jadnogłosnje – jo nam gronił dowěrnik, ak njoco swójo mě w Casniku zjawiś.