Lube źiśi,

něnto jo adwent. Gaž maśo nejnowšy Casnik, jo Nikolaus južo napołnił Waše crjeje. Gaž źeń Nikolausa jo mimo, jo adwent hyšći dłujki. Adwent jo rědny cas, aby něco baslili. Cośo to teke? Dwě ideji mam. Pišu tak, až wužywam dual. To groni: ja pišu tak, až pśecej stej pómjenonej dwě paršonje.

Mójo prědne naraźenje jo: mandarina z gózdźiki. Za to wzejtej se mandarinu. Apelsiny se teke góźe. Wušej togo su nalchenki trjebne. Glědajtej, źož górjejce jo nasajźonk łopjena (to jo małki depcyk). Zaštaptej mandarinu wót tam ze źaśowym kołkom (Stricknadel). Pótom pśetkajtej stabilny drot pśez tu źěru, ako jo tak nastała. Spózy móžotej na drot někaki bublink nawlac a drot zasukaś. Tak njemóžo mandarina drota se wósunuś. Górjejce dej drot pitśku dlejšy wóstaś, snaź 10 centimetari.

Něnto pótrjebatej gózdźiki. Wóni su na jadnom kóńcu póšpicne. Tyknitej te gózdźiki z tym póšpicnym kóńcom do mandarinki. Jo se to raźiło? Pón pśemyslitej sebje muster. Wej ga móžotej  gózdźiki weki a prěki tyknuś do mandariny abo ako někaki motiw. Gwězdka, špirala abo bant su lažke motiwy.