Bramborska dej se staraś, až jězdźenje z busom a zeleznicu buźo za wobydlarje serbskego sedleńskego ruma atraktiwnjejše. To pomina Serbska rada we swójom oficielnem měnjenju ku krajnemu planoju za wózenje luźi we bliskej wokolnosći (Landes­nahverkehrs­plan). Buse a zeleznica deje lěpjej ze sobu zwězane byś, pasažěry deje móc se lažko pśesednuś. Teke města w Dolnej Łužycy deje lěpjej ze sobu zwězane byś. K eksemploju: Tuchylu jo tak, až na wobradowanja komunalnych a wokrejsnych wuběrkow móžoš wětšy źěl jano z awtom pśijěś – wóni su na wjacorach a wóno njejo móžno pótom z busom domoj jěś. Wósebnje pótrjefjona jo zagronita za serbske nastupnosći wokrejsa Górne Błota–Łužyca – rozkładujo Serbska rada.

Wušej togo kritizěruju, až we planje feluju serbske mjenja jsow, gmejnow a městow. Jano na zeleznicowych dwórnišćach su serbske mjenja wiźeś, ale nic pśecej. To dej se na kuždy part pórěźiś. Serbska rada pśirucyjo jim pomoc, kótaruž móžo jim daś referat za nastupnosći Serbow pśi ministarstwje za kulturu.