Pódstupim/Potsdam. Kraj jo Serbskej raźe prědk połožyła rozpšawu (Bericht) k situaciji serbskego ludu w Bramborskej. Serbska rada chwali, až ta rozpšawa jo wjelgin wobšyrna, a z njeje se wuznajo, až kněžarstwo ma wólu na serbske pšawa glědaś a je we praksy pśesajźiś. We swójom stojnišću (Stellungnahme) pominaju pak wót kněžarstwa, aby wuwjadło to, což jo wordowało 2014 pśirucone. Tencas su pśewjadli monitoring, kak Nimska jo dopołniła słušnosći, ak su we europskej charśe mjeńšynowych rěcow wustawjone. Pśede­wšym serbska wucba wót źiśownje až do abitury dej byś we cełem serbskem rumje systematiski pśistupna. Wušej togo dej telewizijny a radijowy program w serbskej rěcy se wutwariś a rozšyriś.

Serbska rada pokazujo na to, až cłonki rady wugbaju we cesnem źěle nadawki, ak se rownaju nadawkam wótpósłanych. Radu pódpěra referentka z 20 źěłowymi štundami na tyźeń. Pśez to, až cłonki rady njesměju sebje nikogo pśi­sta­jiś a teke njamaju žednogo frak­ciskego referenta, ga jo ta licba štundow pśeliš mała. How dej se na kuždy part něco staś.