Depsk/Döbbrick. Depšćanarje su wugótowali zachadnu sobotu k tśeśemu razoju gódowny mark. Kaž južo łoni njejsu te woglědarje jano ze jsy pśišli. Suseźi ze Žylowa, Zaspow, Dešna a z města su pśišli do rozgrona a pśirownali ten depšćański mark z tym měsćańskim. A malsnje su se wobjadnali, až ten měsćański derje jo wjeliki, wuswětlony a wšakoraki, ale za to pak se tam kněžy bejny konsum. „How w Depsku jo wšo wjelgin spódobne a měrne. Ty markujoš, až luźe se mjazy sobu znaju a maju wjasele, až mógu se we měrje rozgranjaś“, jo nam groniła Isabell Beckerowa, ak jo z familiju prědny raz tudy woglědała.

Te gótowarje togo marku su měli dopołdnja wjele źěła – wóni su měli ze sněgom cyniś, ak jo gusto padał. Nježlic su chopili stany (Zelte) twariś, su musali sněg rumowaś. Akle we jśmě jo se swěźeń zachopił.