Baršć/Forst. Dnja 6. decembra 2017 stej „Dom familije Gubin“ (Haus der Familie Guben) a Fachowy wobcerk źiśi, młoźina a familija wokrejsa Sprejwja-Nysa organizěrowałej fachowy event „Take care! – Rownostajensko-politiske wupominanja a perspektiwy za dobre źěło a dobre žywjenje“ do wokrejsnego doma w Baršću. Tema eventa jo była 2. rownostajeńska rozpšawa Zwězkowego kněžarstwa. Ako referentka jo była pšosona profesorka Uta Meier-Gräwe wót Justus-Liebig-uniwersitety w Gießenje. Wóna jo była cłonk w zagronitej wěcywuznatej komisiji (Sachverständigenkommission). W swójom pśednosku jo wědomnostnica pśedstajiła bytostne wugronjenja Rownostajeńskeje rozpšawy a jich zwopšawdnjenje w praksy. Wušej togo wóna diskutěrowała wó strategijach dalšnych póstupow.