Z města/Cottbus. Wušej towzynt luźi jo pśichwatało slědny tyźeń srjodu wjacor do Měsćańskeje hale w Chóśebuzu na tradicionelne pśiwitanje k nowemu lětoju. Pśepšosył jo jich wušy šołta Holger Kelch. Mjazy gósćimi su byli teke zastupniki Domowinskeje župy Dolna Łužyca a serbskich institucijow a towaristwow. Teke Jan Budaŕ, direktor Załožby za serbski lud, jo se wobźělił. W kulturnem programje togo swěźeńskego zarědowanja jo 30 spiwarkow a spiwarjow Dolnołužyskego źiśecego ansambla a Dolnoserbskego gymnaziuma pśibytnych rozwjaseliło z dwěma štuckoma, nawjedowane wót Geralda Schöna.

Ako prědny jo powědał bramborske ministarski prezident dr. Dietmar Woidke. Wón jo wuzwignuł, až grajo Chóśebuzu wjeliku rolu we cełem wuwiśu Dolneje Łužyce. Nowe nimske kněžarstwo by dejało togodla daś wósebnu pódpěru za cełu Łužycu, gaž źo wó to, až budu se how stwóriś pó wuglu nowe struktury we cełem góspódarstwje.