W pśedslědnem tyźenju januara stej pódpisałej dr. Hauke Bartels, direktor Serbskego instituta (SI) a dr. Hartmut Leipner, pśedsedaŕ Spěchowańskego towaristwa za serbsku rěc w cerkwi (STSRC), dogrono wó pśewóstajenju datajow biblije k wózjawjenju w digitalnej a śišćanej formje. Plan jo, až wózjawijo se lětosa w nadawku STSRC elektroniska wersija Serbskeje biblije we tśich wariantach: wótmolowane boki biblije 1868, dataja z tekstom, kenž jo do łatyńskego pisma pśepisany, a dataja we łatyńskim pismje, źož jo se pšawopis moderatnje pśiměrił źinsajšnemu pisanjeju. Teke SI co na swójich internetowych bokach wózjawiś wótpisany bibliski tekst.