Z Picnja/Peitz. Chtož pśi malsnem jězdźenju z awtom wordujo wót błyska wótmólowany, ten njedej jano ze zubami škripotaś, ale teke tu wěstosć měś, až te štrofne pjenjeze budu za dobru a wužytnu wěc wudane. To jo lětosa wulicowała direktorka Picańskego amta Elvira Hölznerowa na woklapnicach we gmejnach Picańskego amta, mjazy drugim w Turjeju a Husu. Rozmjej: Łoni jo Picański amt krydnuł wót běrowa za štrofne pjenjeze w Kopańcach 100.000 euro wupłaśone – to jo wětšy źěł štrofy, ako su jězdźarje a šofery dogromady łoni na drogach Picańskego amta zapłaśili. A za te pjenjeze jo amt hochoskej wognjowej woborje kupił nowe awto ze sykawu.

Ten błysk, ak jo amtoju nejlěpšu „zasłužbu“ pśinjasł, stoj w Picnju ned prězy pśi tej šyrokej droze B168 wót města, jadnab 200 m za toflu. „Chtož z města pśiźecy z awtom smali, ten dej se wusměwknuś“, jo Hölznerowa gano na woklapnicy w Husu žortowała.