Z Wjerbna/ Werben. Njeźelski wobjed jo dało za Wjerbanarjow na prědnej februarskej njeźeli ned za drugeju fryštuku. Pśicyna za to: Nicht njejo kśěł skomuźiś 178. zapust młoźiny. A tak njejo žeden źiw, až su domacne a jich gósći pó hundertach pśi droze stojali a su swěźeńskemu pśeśěgu młoźiny wjasele pśiwołali a jich wutšobnje wuwitali z aplausom.

Prědku stej šłej Jessica Christoph a šef młoźiny Patrick Domaschenz. Wósebnje wjele pśiklaska a pśiwołanja wót wejsanarjow jo dało za togo 26lětnego. Źěkowali su se jomu za jogo dłujkolětne źěło ako šef młoźiny.

Jonas Albrecht, 17lětny gymnaziast, wót něnta toś to zagronite źěło wugbajo. Jomu pśi boku stoj 20lětny wuknjeńc Kay Herzberg. Wón jo pśiducny vicešef młoźiny a jo lětosa źaržał zapustojske nagrono w serbskej rěcy.

Wjerbańske kšuśe źarže k tym serbskim tradicijam a woplewaju serbske nałogi, to jo se w swěźěńskem pśeśěgu młodych muskich a źowćow pokazało. 11lětna Lilli Zander jo recitěrowała serbsku baseń.