Ze Smogorjowa/Schmogrow. Hejnak by na njebju pśešaltowali na dobre wjedro – hynac ako te druge dny, gaž jo pśi camprowanju pokazała zyma hyšći raz swójo pochmurne a děšćowate woblico – pśi rědnem słyńcu jo swěśiła Smogorjojska młoźina njeźelu, 4. februara swój wobwěsćony 143. zapust.
Wócywidnje jo se młoźinje raźiło, zymu wugnaś z muziku, rejami a pisanymi kostimami. Tu njeźelu něnt su se źowća pokazali w swójich rědnych serbskich drastwach a gólcy su se teke wufajnowali ze šamnymi woblakami a ze zapustojskim štrusom na kłobyku.
Tom Siegert jo wuwitał bejnu licbu gósćow w serbskej a Emy Bramer w nimskej rěcy. Pśi tom jo šefowka młoźiny małkeje wjaski wuzwignuła wóznam zapusta za wejsne žywjenje a zagronitosć młoźiny za dalejwobstaśe teje stareje tradiciji.