Ta „nula“ pópšawem nic gódnego njejo. Casy pak jo wjelgin wažna, wósebnje pón, gaž wóna slězy stoj. To jo se pokazało w Casniku slědny tyźeń wó woglěźe na Balkanje, źož sćo mógali cytaś 3. źěl reportaže. „Wušej 500 kilomejtari pó Balkanje“ jo tam stojało, ale to jo było jich wušej 5500 kilomejtari! To jo dejało byś gronjone!

Małki źěl teje dłujkeje jězby – něźi 150 kilomejtari – jo nas dowjadł z kroatiskego Dubrovnika do susednego kraja Montenegro – Crna Gora –, z něźi 625.000 wobydlarjami ten nejmjeńšy stat na Balkanje. Jano tak wjeliki ako Šleswig-Holsteinska ten kraj jo. Za to pak jo brjog pśi Módrej Adriji ze pśisamem 300 km bejnje dłujki, a z tym napšawdu paradiz za wšych, ako lubuju mórjo. Statistika groni, až słyńco swěśi tam 2720 góźinow wob lěto a až móžoš se tam kupaś a we śopłem słyńcu wódychaś jaden mjasec dlej ako w Španiskej a Francojskej. Žeden źiw, až pśiźo tudy z turizma nejwěcej pjenjez do statneje kase Montenegro...