Lube źiśi,

we slědnem wudaśu sćo cytali wót ptaškoweje swajźby. Tam jo stojało, kak su ju swěśili we Chóśebuzu, Žylowje a Janšojcach.

We drugich źiśownjach su ten swěźeń ale teke wugótowali. Ze źiśownje „Tyca“ we Hochoze smy teke rozpšawu dostali. Cytaj, cytajtej a cytajśo sami:

We našej źiśowni su ‚Lutki‘ teje Witaj-kupki swěśili ptaškowu swajźbu. Dłujko do togo smy źiśi na to pśigótowali. Smy z nimi wobraze mólowali, smy baslili, jim tšojenja wulicowali, spiwy spiwali a nawuknuli.

Dnja 18. januara smy źiśi pśewoblakli ako ptaškowu rědownju. Njewjesta a nawóžeń stej byłej we serbskej drastwje woblaconej. Valentina jo lětosa njewjesta była. Kathrin Tilgnerowa jo ju woblekała. Nawožeń Marwin jo se woblakł śamny woblak. Póbraška jo był Franz Ruben. Wón jo wjele cyniś měł a jo nawjedował swajźbarski pśeśěg.

Gósći teje swajźby su byli źiśi kupki „Wacki“ a „Jěžyki“. Zgromadnje su wšykne spiwali, rejowali a gósćinu swěśili.