Z Depska/Döbbrick. „Pomogajśo luźi pśeznaniś, aby słali swóje źiśi do serbskeje wucby. Wulicujśo luźam, cogodla jo to gódne serbsku rěc wuknuś“ – tak jo napominał něgajšny župan Měto Nowak zastupniki Domowinskich kupkow a towaristwow pětk wjacor na głownej zgromaźinje dolnołužyskeje Domowiny w zalu pśi sportnišću. To jo był jaden wót wjelich diskusijnych pśinoskow na zgromaźinje. Pśedsedaŕ Serbskeje rady Torsten Mak jo wulicował, až serbske zastupniki su musali nadběgi wótwoboraś [glej nastupnosć wustawjenja za serbsku wucbu]. Až jo se to raźiło, na tom maju swóju źělbu starjejše, kótarež su protestěrowali pśeśiwo planam ministarstwa. Toś jo wón napominał zgromaźinu „Pódpěrajśo starjejšysku iniciatiwu a diskutěrujśo kubłańske nastupnosći w kupkach: Co móžośo cyniś, kak gótowaś reklamu za šulu a te jadnotliwe wucabniki a wótkubłarje na měsće pódpěraś“.