Z Pódstupima/Potsdam. Bramborski parlament jo stwórtk se wobjadnał, až zagronite za serbske nastupnosći we wokrejsach serbskego sedleńskego ruma deje byś we pśichodu połnje pśistajone a głownoamtske, a kosty za to pśistajenje buźo Bramborska njasć.
To jo se stało na póžedanje kněžarstwoweje koalicije SPD a Lěwice, pśi comž wósebnje Lěwica jo we tej nastupnosći iniciatiwu wopokazała. To póžedanje jo wordowało wót wšyknych frakcijow a jadnogłosnje pśiwzete a do głownego wuběrka (Hauptausschuss) parlamenta dalej dane (kaznidawarska procedura to pomina). Stakim njejo to hyšći wobzamknjona kazń (jeje połne mě zni: „Druga kazń k pśeměnjenju pšawniskich pśedpismow dla pšawow Serbow w Bramborskej“), ale pśiamem wěste jo, až hyšći lětosa budu ju wobzamknuś a wóna buźo ze zachopjeńkom lěta 2019 połnje płaśiś.