Z Chóśebuza/Cottbus. Serbske šulske towaristwo (SŠT) jo pětk tyźeń w Měsćańskem domje dostojnje swěśiło 20lětny jubilej Witaj-projekta. Na swěźeń su wordowali pśepšosone politikarje, wótkubłarje, ceptarje, zastupniki institucijow a teke serbske wobydlarje jsow – z krotkim wšykne, kótarež maju z Witaj-gibanim cyniś a su jo pódpěrali abo dalej pódpěraju.
Co Witaj jo, daś jo how hyšći raz krotko wobspomnjete: Koncept k nawuknjenju serbskeje rěcy we źiśecych lětach pó metoźe imersije, to groni „kupanja we rěcy“. Źiśownice, nanejmjenjej někotare, powědaju we źiśowni ceły źeń serbske ze źiśimi, kótarež za wětšy źěł wót doma jano nimske powědaju. Pśi powědanju ze źiśimi płaśi regula: jadna paršona, jadna rěc. Z casom wuknu źiśi serbske rozměś, a teke dlej a wěcej serbske powědaś. Naspjet jo to załožk za dalšnu bilingualnu wucbu w šuli.
Ze załoženim prědneje Witaj-źiśownje w Žylowje pśed 20 lětami jo nastała stakim naźeja, až ten za wšym zdaśim wěsty kóńc dolnoserbskeje rěcy buźo se hyšći zacasa wótchyliś. A až źěra we dalejdawanju rěcy wót dweju generacijowu dajo se zapłataś.
*