Z Wjerbna/Werben. Zachadny kóńc tyźenja jo dało za lubowarjow serbskich ludowych rejow dwě zajmnej zarědowani: Sobotu wjacor su we Werbnje, w gósćeńcu „Ku gwězdźe“ kazali na reju z dujarskeju kapału „Prostataler Blasmusikanten“ a z folk-kupku „Serbska reja“ z Lipska. Pód nawjedowanim rejowarskego pedagoga Michaela Apela su luźe mógali regionalne reje nawuknuś a ned wuproběrowaś.

Špatne wjedro a myslenje na gładke drogi su gósći z dlejšeju domojdrogu wóttšašyli. A młogi jo snaź teke na spótny cas se myslił. Ale pšawje rozbuźone lubowarje ludowych rejow, wósebnje rejowarje, kenž su se juž cesćej pla Michaela Apela na jogo rejowarskich wótpołdnjach wobźělili, su moto wjacora „Wjasele do rejki“ raźi pśiwzeli.