Z Depska/Döbbrick. Tu ideju, až by mógali tudy – kaž we susednych jsach – woklapnicu pśewjasć, njejsu doněnta wuwjadli. To jo nam na našo pšašanje powěźeła prědkstojarka jsy Barbara Merzowa. K dopomnjeśu: We lěśe 2015 jo delegacija z Depska (cłonki depšćańskeje pśirady) se wobźěliła ako gósći na woklapnicy w Dešnje. Ta wjelika gmejnska gromada jo se jim wjelgin zespódobała, a tencas jo Merzowa nam wulicowała, až buźo wopytaś znowa woklapnicu w Depsku organizěrowaś.

„My njejsmy wót měsćańskego zastojnstwa te póžedane statistiske daty dostali“, kritizěrujo prědkstojarka, a to zadoranje jo za jeje zdaśim sobu wina, až su tu nastupnosć z wócowu pušćili [Depsk jo źěl města]. Něnto jo wejsna pśirada z drugimi wěcami zabrana. Wobstawny problem jo nadalej wejsna droga – wóna jo južo wjele lět wjelgin brašna a dej se skerjej a lěpjej pórěźiś. To grono pak ma zasej město, a Depšćańske su njespokojom, až muse tak dłujko na to pórěźenje cakaś.