Dolnołužyska Domowina jo w Depsku wótźaržała głownu lětnu zgromaźinu. Ta sama jo wótběgnuła harmoniski, mimo wjelikich wjeraškow a mimo kontrowersow – dominěrowała jo spokojnosć ze stabilnym wuwiśim a raźonymi wugbanjami.
Rozpšawu (Bericht) župnego pśedsedarstwa jo pśednjasł župan Wylem Janhoefer z Brjazyny. We njej jo wobspomnjeta naglědna licba aktiwitow župy na wšyknych pólach, ale teke problemy pótusnjone, kótarymž kśě se něnto pśiwobrośiś. We diskusiji su gronjarje mjazy drugim napominali towaristwa a kupki, aby wěcej wabili k serbskej wucbje, a teke pomogali towaristwam we „nowych“ serbskich gmejnach. Wobźěliło jo se wokoło 70 zastupnikow kupkow a towaristwow.