Něgajšny župan Měto Nowak jo zgromaźinu napominał, aby njepušćili šulstwo z wócowu. Protesty pśeśiwo njegódnym wobzamknjenjam ministarstwa su jadna wěc, ale rowno tak wažne su licby wuknikow we serbskej wucbje. „My dejmy luźi pśeznaniś, aby źiśi do serbskeje wucby słali. Wulicujśo we rozgronje z luźimi, dla cogo jo gódne serbsku rěc wuknuś“. To jo šym wažnjejše, pśeto „teke na Dolnoserbskem gymnaziumje njestoje wšykne ceło za serbskim profilom“.

Nowak jo wobspomnjeł serbski sedleński rum. We wjelich gmejnach jo dosć pśichylonych luźi, kótarež su wótwórjone, ale weto se pšašaju: Co něnto? Domowinske towaristwa by mógali wužywaś priwatne kontakty a jim pomogaś a jich na ideje spóraś.