Maximilian Hasacki na zapusće lětosa, gromaźe z Johannu Lierschojc. Wón studěrujo w Lipsku, lětosa buźo swój bachelor-studium dokóńcowaś a ma prědk w Londonje dalej studěrowaś. Domoj do Dešna pśiźo tuchylu cesto, wósebnje gaž we jsy swěśe. 
Študańc chemije na Lipšćańskej uniwersiśe Maximilian Hasacki (21) jo, možoš groniś, tak stary ako Witaj-projekt w Dolnej Łužycy. Wón jo słušał k tym prědnym źiśam, kótarež su w žylojskej źiśowni Mato Rizo w lěśe 1998 wót wšogo zachopjeńka chopili wuknuś serbsku rěc pó metoźe imersije. A wón jo měł až do abitury 2015 njepśestawajcy serbsku wucbu. Co jo to pśinjasło? Co Witaj-projekt za jogo zdaśim we cełem wugbajo? Kak glěda wón na rewitalizaciju serbskeje rěcy? Gregor Wieczorek jo se z nim rozgranjał.
*
Nowy Casnik: Ty, kaž pśisamem kuždy we twójej generaciji, sy wótrosł doma w Dešnje z nimskeju rěcu. Něnto pak se rozgranjamej na serbski. Wulic nam wót swójeje serbskeje drogi...