Kužde lěto organizěrujo Šula za dolnoserbsku rěc a kulturu „Serbske wótpołdnjo“ za maminorěcne wobydlarje serbskich jsow. Lětosa smy jim kazali sobotu tyźeń pśed jatšami do Drjenowa do gósćeńca „Jagdhof“, a jadnab 80 luźi jo pśichwatało ze wšakich stronow Dolneje Łužyce: z Kalawy, z Luboraza, ze Złego Komorowa, z Janšojc a z Chóśebuza. Wšykne su kśěli dožywiś rědne towarišne zmakanje ze serbskeju kulturu a rěcu. Take wótpołdnjo jo dobra góźba se zmakaś ze znatymi a pśijaśelami ze drugich jsow a zasej se rozgranjaś w serbskej rěcy ako we starych casach. Ale chtož se mysli, až tam su jano stare luźe gromadu pśišli, se móli. Teke někotare źiśi a młoźina su pśibytne byli.