Europska partaja EFA (Europska licha alianca, ak jo w Europskem parmalenśe z 11 wótpósłanymi zastupjona) jo na głownej zgromaźinje w Landshuśe w Bayerskej wobzamknuła oficielnu wopowěsć, až pódpěraju wuzwólowanje serbskego parlamenta a až budu pśipóznaś jogo rezultaty. To póžedanje za takim wobwěsćenim jo zapódała Iniciatiwa za Serbski sejm, kótarejež cłonk Hanzo Wylem-Kell z Huštanja jo tejerownosći pśedsedaŕ partaje Łužyska alianca, ako jo naspjet cłonk EFA. „Pśez to jo pódpěra europskich gremijow wěsta, a Nimska, Sakska a Bramborska budu napominane, až deje basis-demokratiski proces aktiwnje pódpěraś a pomogaś, aby demokratiski legitiměrowane zastupnistwo Serbow se etablěrowało“, měni Wylem-Kell. Za jogo powěsću buźo EFA swóje pśiglědarje pósłaś, ako budu tomu zjawnemu licenju głosow pśiglědaś.

EFA jo w Landshuśe wobzamknuła teke druge wopowěsći: mjazy drugim k temam ako biodiwersita w rolnikarstwje, pušćenje katalańskich politikarjow ze špańskego popajźeństwa a pódpěra Kurdam.