Z Bórkow/Burg. Južo 11. raz pśeměniju se Bórkowy k Swětkam do kraja legendow. Program za lětosnu „Noc powěsćow“ jo gótowy a woglědarje mógu se zasej wjaseliś na kšasne źiwadło pód gołym njebjom pśi Bismarckowem tormje.

K 4. razoju jo Serbski ludowy ansambel zagronity za wuměłski part togo spektakla. Libretistka Jěwa-Marja Čornakec jo se, nawězujucy na te zachadne zarědowanja, wumysliła nowe tšojeńko wót graśa wó móc we Łužycy, połne intrigow a lubosćinskich zapletkow.

Tšojenje z titelom „Swajźba“ grajo něźi 20 lět pó tšojenjach slědneje „Nocy powěsćow“ a pśibližyjo se tenraz wopšawdnym historiskim stawiznam we Łužycy w 11. stolěśu. Jadna inspiracija za tšojenje jo lětosny 1000 lětny jubilej Budyšynskego měra: Mjazy pólskim wojwodstwom a nimskim kejžorstwom wjeźo se wójna, kótarejež tšašne wustatkowanja až k Błotam dosegaju. Lud jo póžedał za měrom a jo se naźejał, až jaden nowy Serbski kral pśiźo a jich wobzwarnujo.