Z Bórkow/Burg. Wót 1. awgusta buźo slědne lěto we źiśowni to pśebywanje zadermo. Za serbske źiśownje kśě wót tog dnja tek něco pólěpšyś, na iniciatiwu wokrejsa Sprjewja-Nysa. Na pósejźenju Serbskeje rady 10. apryla su toś powědali wó koncepśe, serbsku rěc we źiśownjach dalej pódpěraś pśez dodatny personal. Witaj-wótkubłarki ga powědaju serbski ze źiśimi a pósrědnjaju te samske wopśimjeśa a te same kompetence ako we kuždej drugej źiśowni. To, tak wiźi to wokrejs, njedajo se zwónoźeś z kazniskim personalnym klucom. Togodla naraźijo wokrejs krajny program, z kótarymž budu pódpěraś wucenje serbskeje rěcy we źiśownjach (k tomu słušaju teke góletkownje a horty). Druge naraźenje jo, konsultacisku instituciju we kraju Bramborska spěchowaś, za fachowu wuměnu a transfer do prakse za źiśownje, źož źiśam dalej dawaju serbsku rěc. Te fachowe wótkubłarki tam deje wuměś serbsku a nimsku rěc. We tych źiśownjach kśě spěchowaś dodatne personalne mócy, 0,5 abo cełe źěłowe městno. Wušej togo maju prědk, za wěcne srědki 500 € w lěśe k dispoziciji stajiś.