Drježdźany/Dresden. Serbska spisowaśelka a pśestajarka Róža Domašcyna, ako bydli we Budyšynje, dostanjo Sakske literarne myto lěta 2018. Wucesćenje jo dotěrowane z 10.000 euro a dej pśipóznawaś wobšyrne serbske a nimskorěcne twórjenje Domašcyneje. W nazymje buźo jej to myto pśepódane, na zarědowanju pśi góźbje rěda „Landnahme“. To jo sakske ministarstwo za wuměłstwo we Drježdźanach zachadnu wałtoru znate cyniło. Domašcyna twari we swójom źěle mósty mjazy serbskeju a nimskeju kulturu a wuměłstwom, nawězujo na serbske tradicije a wjeźo je do modernego casa, jo jury chwaliła.

Domašcyna jo naroźona w lěśe 1951 a jo nejžpjerwjej studěrowała inženjersku ekonomiju górnikojstwa we Złem Komorowje a wót 1985 do 1989 na Lipšćańskem literarnem instituśe. Wóna jo wjele knigłow z basnjami wózjawiła, mjazy nimi wuměłske zwiski. Wušej togo jo basniła pśestajenja, jo publicěrowała źiwadłowe graśa a słuchoknigły. Wóna jo cłonk PEN-centruma a Sakskeje akademije wuměłstwa.