Musym pśidaś, až pśepšosenje na „klawsuru“ Serbskeje wósady pśeliš chytše było njejo. Gaž se myslim na dawne klawsury w matematice na zachopjeńku mójogo studija w Praze, mam njedobre zacuśe. Wótergi hyšći źinsa w nocy wócuśejom měnjecy, až njejsom dosć derje wuknuł. Łatyńske słowo „clausura“ měni wuzamknjenje, rozmjej: žywy byś w samośe hejnak w kloštarju. Naše politikarje lubuju se zejś na klawsurne pósejźenja, což měni, až zjawnosć jo wuzamknjona.