Z Chóśebuza/Cottbus. Na wobradowanju měsćańskego wuběrka za socialne nastupnosći, rownopšawnosć a pšawa mjeńšynow zachadnu srjodu jo zagronita za serbske nastupnosći Anna Kosakojc-Kozelowa źaržała grono. Wóna jo mjazy drugim wobspomnjeła, až město Chóśebuz jo dobyło tśeśe město we akciji „Serbska rěc jo žywa“ a jo cłonkam wuběrka pokazała power-point-prezentaciju wót serbskich aktiwitow w měsće. Wósebnje zaspomnjeła jo fakt, až Budyšyn – głowne město Górnych Serbow – njejo se na akciji „Serbska rěc jo žywa“ w Sakskej wobźělił. W Chóśebuzu pak su kśěli na ten part wědobnje wopokazaś respekt serbskim měsćanarjam a institucijam, kótarež se wó serbsku rěc procuju. Nowe a chwalobne jo, až serbsku rěc pokazuju dlej a wěcej w zwěrjetnem parku, a až město płaśi 50% myta sobuźěłaśerce za serbske młoźinske źěło w měsće.

K dalšnym wobspomnjetym tšojenjam jo słušało cesćenje fararja Bogumiła Šwjele pśi góźbje jogo 70. smjertnego dnja, ako buźo witśe (stwórtk, 17. maj, glej zapisk terminow). Na njo su teke měsćańske wótpósłane pśepšosone.