Pśijěźoš-li do Hochoze, ga pokažo pśi głownej wejsańskej droze toflicka na muzej „Kólasko“. Muzej jo źěl kulturnego centruma, kenž su 2003 wótwórili w něgajšnej kjarcmje pó jeje dopołnem wobnowjenju. W hochoskem kulturnem centrumje su wušej togo zaměstnjone młoźinski klub, rumnosć za pósejźenja a zal za sportowu kupku a kulturne zarědowanja. Muzej „Kólasko“ derje informěrujo wó źinsajšnem a zajźonem žywjenju dwójorěcneje gmejny. Na pśikład zgónijoš, až jo se Hochoza w lěśe 1504 prědny raz naspomnjeła. Tudejše luźe su na swój muzej gjarde a jen maju za wósebnu atraktiwitu.