Z Dešna/Dissen. Na dnju wótwórjenja zeloweje zagrody tudy (glej pśipódla) jo se we jsy teke howacej wjele tšojło. Centrum za naturowědu ga jo teke wótwórił swóje źurja gósćam. Cłonk pśedsedarstwa Dietmar Haufe z Hochoze jo jich wjadł k bóśonowym gnězdam, k rěce a jo jim pokazował na Nowakojc dwórje sadowe bomy a we brožni wustajeńcu wót renaturěrowanja rěki. Pcołkaŕ Reinhard Šułtka z Drjejc jo wulicował wence, pśi pcołkarni, wót žywjenja pcołkow. Wón jo gósćam kazał k pcołkarni stupiś, wótcynił kašć a jo jich pšosył, aby sebje z njogo z nageju ruku błonku (wabu) mjodu wuśěgnuli. A to z nagim woblicom! Nicht njejo wordował štapjony, pśeto ten pcołkaŕ jo jim zaprědka wukazał, kak deje se zaźaržaś: Wóni njesměju se njezjapki gnuś daniž cypotate byś. A chtož jo paleńc pił abo z parfimom jo wochropjony, ten smějo jano wótnazdala pśiglědaś. Wóni su sebje ze łžycku mjod z teje waby wuškrabali a jen jědli. Wóni su byli wše zapalone.