Ze Stareje Niwy/Altzauche. Kuždy tyźeń wałtoru rozšyrja se tudy we cełej jsy aromatiska wóń pjaconych mlincow. Na tom jo wina tudske tradiciske towaristwo ze swójimi 45 cłonkami. Wót zeger 14.00, wu Hanškojc (Hanschkow-Haus, sedło towaristwa) – we burskej śpě, pó swěźeńsku wupyšnjonej –, pódawa se gósćam specialita, kótaraž drje njama niźi swójogo rownja: originalne błośańske droždźějowe (Hefe-) mlince!
*
Pónjeźele pśed dwěma tyźenjoma, 7. maj, jo staroniwjańske towaristwo wótwóriło mlincowu sezonu, kótaraž buźo traś do septembera. To prědne lětosne pjacenje su wobstarali pśi pjacu Monika Šejcykowa (Schötzigk), Waltraud Hempelowa a Petra Luxowa.
Južo krotko pó wótcynjenju śpy su wšykne města byli wobsajźone. A to stojadło za kólasa jo było z kólasami kradu wuzastajane. Wandrarje a kólasarje su pśišli z Barlinja, Chóśebuza, Lubnjowa, Luboraza, Tšupca, Slopišćow, Bórkow, Wjerbna, Bobolc. A teke žedne urloparje z dalšych stronow.